Rama në Forumin e Investimeve BE-Ballkani Perëndimor: “Ballkani nuk është problem për t’u zgjidhur, por zgjidhje që pret të integrohet”
Ka nisur sot në Pallatin e Kongreseve në Tiranë Forumi i parë i Investimeve BE-Ballkani Perëndimor, një ngjarje dyditore që zhvillohet më 13-14 tetor dhe që sjell në kryeqytetin shqiptar liderë evropianë dhe rajonalë për të diskutuar mbi bashkëpunimin ekonomik dhe integrimin.
Në forum merr pjesë edhe Presidentja e Komisionit Evropian, Ursula von der Leyen, ndërsa kryeministri i Shqipërisë, Edi Rama, në fjalën e tij falënderoi Komisionin Evropian për mbështetjen e vazhdueshme në rrugën e Shqipërisë drejt integrimit evropian.
“Dua të falënderoj skuadrën tuaj për bashkëpunimin e jashtëzakonshëm për të bërë realitet këtë gjë. Për një kohë të gjatë, historia e Evropës dhe e Ballkanit Perëndimor është shkruar me gramatikën e pritjes. Por kur momenti erdhi, ne ishim të përgatitur për të nisur së bashku me KE-në procesin e negociatave që nuk mund të ishte më intensiv dhe më çlirues nga fantazmat e së shkuarës,” deklaroi Rama.
Kryeministri theksoi se rajoni po përjeton një rritje ekonomike dy herë më të shpejtë se mesatarja evropiane, duke e cilësuar këtë si një “horizont të ri zhvillimi”.
“Ballkani Perëndimor nuk është lagjja e Europës e dorës së dytë, por është horizonti i ri – një horizont jo prej muresh dhe kufijsh, por horizont energjie dhe imagjinate, ku Europa mund të rizbulojë shkathtësinë e saj, oreksin, urinë e saj, nxitjen krijuese dhe mbi të gjitha dashurinë për jetën, paqen dhe të bërit bashkë,” u shpreh Rama.
Në përmbyllje të fjalës së tij, ai bëri thirrje që Ballkani të shihet nga institucionet evropiane si një mundësi e re për partneritete dhe zhvillim.
“Sa më shumë hedhim sytë nga bota rreth nesh, aq më shumë ndjejmë nevojën për më shumë Evropë. Ballkani Perëndimor mund të bëhet laboratori i Evropës, një hapësirë ku investimet shkojnë nga ideja në realizim më shpejt, ku BE-ja dhe rajoni takohen për ta bërë të ardhmen realitet. Ballkani nuk është problem për t’u zgjidhur, por një zgjidhje që pret të integrohet,” përfundoi Rama.
